Ҷашни Наврӯзи байналмиллалӣ дар Муассисаи давлатии “Коллеҷи фарҳанги ҷумҳуриявии ба номи П.Бӯйдоқов бо шукӯи хоса таҷлил гардид.

         Дар асоси Нақша-чорабиниҳои муассиса бахшида ба таҷлили ҷашни байналмилалии «Наврўз» санаи 19 марти соли 2021 бо роҳбарии директори Муассисаи давлатии “Коллеҷи фарҳанги ҷумҳуриявии ба номи П. Буйдоқов” Разоқов Салоҳидин Шамсидинович барномаи идонаи наврўзӣ таҳти унвони «Наврўз-эҳёгари фарҳанг ва суннатҳои миллист» бо намоиши васеи ҳунарҳои миллии мардумӣ дар сатҳи баланди фарҳангӣ баргузор гардид.

            Дар ифтитоҳи чорабинии фарҳангӣ директори муассиса ва намояндагони Вазорати фарҳанги Ҷумҳурии Тоҷикистон Толибова Раҷабгул, Самиев Абдуразоқ, инчунин муовини раиси ноҳияи Рӯдакӣ Хайрулло Суфиев намояндаи Кумитаи иҷроияи ҲХДТ дар ноҳияи Рӯдакӣ Олим Назаров, мудири бахши кор бо ҷавонон ва варзиши ноҳия Абдулло Сатторӣ, Сармуҳаррири рӯзномаи ноҳиявии “Насими айём” Рухшона Шобудинова, бо суханони шодбошию табрикоти кулли иштирокчиёнро ба хусус наврасону ҷавонони боистеъдодро ба муносибати таҷлили иди байналмилалии «Наврўз» ва пайки омад-омади оғози фасли баҳори файзбор самимона табрику муборакбод намуданд.

         Сипас, баъди анҷоми суханрониҳо ба як қатор кормандону омӯзгорон ва донишҷўёни фаъол  нишони «Аълочии фарҳанги Ҷумҳурии Тоҷикистон», «Аълочии матбуоти Ҷумҳурии Тоҷикистон», Ифтихорномаи Вазири фарҳанги Ҷумҳурии Тоҷикистон ва дигар ифтихорномаву сипосномаҳои соҳавӣ тақдим карда шуд.

        Мавриди зикр аст, ки дар чорабинии идонаи наврўзӣ намоиши васеи таъомҳои миллӣ, дастархони ҳафтсин-ҳафтшин, суманакпазӣ, оши бурида, оши палов, қурутобу шакароби миллӣ, таҳмолпазӣ, кулчақанду ҳалвои дегӣ, инчунин намунаҳои расмҳои гуногуни бачагона, гулдўзию чакандўзӣ, қуроқбофӣ, хонаи арўсон, усмамолию чолбандбофӣ, гаҳворабандӣ, буҷилбозию, бандкашӣ, гуштини миллӣ  ва асбобҳои миллии мусиқӣ ба маърази тамошо гузошта шуда буданд, ки ба меҳмонону тамошобинон қобили қабул гардид.

Дар идомаи чорабинии наврўзӣ аз ҷониби санъаткорони шинохта ва ҳунармандону истеъдодҳои ҷавони муассиса барномаи консертӣ бо пешниҳоди суруду таронаҳои баҳорӣ, навозиш бо созҳои мусиқии миллӣ, найбазм, дойрабазм, карнайбазм, таблакнавозию дабалнавозӣ, рақсҳои чолиб ва фалаксароии миллӣ бо шукўҳу шаҳомати хоси наврўзӣ баргузор гардид, ки хотири мухлисону иштирокчиёнро шод гардонид.

         Мақсад аз баргузории барномаи наврўзи пайваста ҷалб намудани наврасону ҷавонони соҳибистеъдод ба чорабиниҳои фарҳангӣ, мустаҳакам намудани баззаи эҷодии муассиса, ҳавасмандгардонии чеҳраҳои ҷавон барои иштирок дар озмуну фестивалҳои ҷумҳуриявию байналмилалӣ, тарбияи насли наврас дар рўҳияи ватандўстӣ, хештаншиносӣ, ҳисси зебоиписандӣ ва соҳиб касб гардидани наврасону ҷавонон арзёбӣ мегардад.

Воҳидов М.

Муассисаи давлатии “Коллеҷи фарҳанги ҷумҳуриявии ба номи П.Бӯйдоқов” сазовори ҷои аввал гардид

Бо мақсади дарёфти камоли маънавӣ ва дар вуҷуди насли ҷавон бедор намудани эҳсоси ватанпарастиву хештаншиносӣ дар доираи чорабиниҳои ҷашнӣ бахшида ба Рӯзи Модар бо роҳбарии Кумитаи иҷроияи ҲХДТ дар ноҳияи Рӯдакӣ ва ҳамкории Раёсати маорифи ноҳия санаи 1 марти соли  равон дар байни хонандагони муассисаҳои таҳсилоти миёнаи  умумӣ ва донишҷӯёни Коллеҷҳои ҳудуди ноҳияи Рӯдакӣ даври ниҳоии озмуни иншои беҳтарин дар мавзӯи “Модар яктост-Тоҷикистон яктост”  баргузор гардид.

Бо дастгирии директори Муассисаи давлатии “Коллеҷи фарҳанги ҷумҳуриявии ба номи П.Бӯйдоқов” Салоҳидин Разоқов аз муассиса се нафар донишҷӯёни фаъол  дар озмун иштирок карда, дар бораи Ватани азизи худ-Тоҷикистон иншо навистанд.

Ҳар як иншои хонандагон ва донишҷӯёнро  доварон ҳаматафа санҷида, ғолибонро муайян намуданд.  Аз рӯи  хулосаи доварон  ғолиби-озмун  донишҷӯи Муассисаи давлатии “Коллеҷи фарҳанги ҷумҳуриявии ба номи П.Бӯйдоқов”  Раҷабова Мавлуда эълон шуда,  сазовори ҷои аввал гардид.

Санаи 4-уми марти соли равон дар фазои идона аз ҷониби корманди Кумитаи иҷроияи ҲХДТ дар ноҳияи Рӯдакӣ Раҳматулло Аҳмадзода ва намояндагони Мақомоти иҷроияи ҳокимияти давлатии ноҳия, Раёсати маориф ба ғолибон  мукофотпуливу  Ифтихорнома ва ба устодони онҳо Сипосномаҳо тақдим гардид.

Санаи 4 марти соли 2021 Шӯъбаи кор бо занон ва оила дар якҷогӣ бо бахши кор боҷавонон ва варзиши ноҳияи Рӯдакӣ озмуни ноҳиявии “Суруди модар-Алла”-ро  дар байни донишҷӯёни Коллеҷи техникию омӯгорӣ, Коллеҷи тиббӣ ва Муассисаи давлатии  Коллеҷи фарҳанги ҷумҳуриявии ба номи П.Бӯйдоқов  баргузор намуданд. Дар озмун донишҷӯёни  Коллеҷи фарҳанг бо роҳбарии директори таълимгоҳ Разоқов Салоҳидин иштирок намуданд.

Аз рӯи шартҳои озмун: саломномаи дастаҳо, рақси якка, саҳначаи тарбиявӣ, суруди алла, печонидани кӯдаки навзод, омода намудани хуриши баҳорӣ донишҷӯён ҳунар ва маҳорати худро пешниҳоди ҳакамон гардониданд.

Доварон баромади ҳар як иштирокчии озмунро бо таваҷҷуҳи хоса тамошо карда, ба онҳо баҳои арзанда доданд. Дар ҷамъбасти озмун аз ҷониби ҳакамон эълон гардид, ки донишҷӯёни Муассисаи давлатии  Коллеҷи фарҳанги ҷумҳуриявии ба номи П.Бӯйдоқов  талаботҳои озмунро пурра риоя намуда, ҳамаи шартҳои озмунро дар сатҳи баланд иҷро намуданд ва  сазовори ҷои аввал гардиданд.