КОНСЕРТИ ҲИСОБОТИИ КОЛЛЕҶИ ФАРҲАНГ

         Санаи 21-уми майи соли 2019 дар толори Қасри фарҳанги ноҳияи Рӯдакӣ ба муносибати 30 солагии Истиқлолияти давлатии Ҷумҳурии Тоҷикистон, Рӯзи ҷавонони Тоҷикистон ва гиромидошти хотираи  шоири Халқии Тоҷикистон устод Лоиқ Шералӣ консерти ҳисоботии солонаи устодон ва донишҷӯёни Коллеҷи фарҳанги ҷумҳуриявии ба номи П.Бӯйдоқов баргузор гардид.

         Дар чорабинӣ намояндаи Вазорати фарҳанги Ҷумҳурии Тоҷикистон Музаффар Темурзода, декани факултаи мусиқӣ –омӯзгории Донишкадаи фарҳанг ва санъати Тоҷикистон ба номи М. Турсунзода Муслиҳиддин Солеҳов, мудири шуъбаи рушди иҷтимоӣ ва робита бо ҷомеаи Дастгоҳи раиси ноҳияи Рўдакӣ Маҳмадализода Маҳмадшариф намояндаи ҲХДТ дар ноҳияи Рӯдакӣ Олим Назаров, директори Коллеҷи техникӣ – омӯзгории ноҳияи Рӯдакӣ Наҷмиддин Ширинзода, мудири бахши кор бо ҷавонон ва варзиши ноҳияи Рӯдакӣ Абдулло Сатторӣ ва дигар меҳмонони даъватшуда иштирок намуданд.

         Консерти ҳисоботӣ дар сатҳи баланд доир гардида, устодон ва донишҷӯёни муассисаи таълимӣ аз рӯи 21 номераи барнома ҳунару истеъдоди худро манзури ҳозирин гардониданд. Таваҷҷуҳи аҳли толорро номераи “Доирабазм”, “Навозиши шаршара”, саҳнаи тарбиявӣ таҳти унвони “Никоҳи хешу таборӣ”, бадеҳаи “Гул ба домон”, қироъати шеърҳо, хори умумии “Арсаи Ваҳдат”  ва ғайра бештар ҷалб намуданд, ки тамошобинон барои истеъдоди баромадкунандагон кафкӯбиҳои бардавом заданд.

Бояд иброз дошт, ки роҳбари бадеӣ Қурбоналӣ Шомаҳмадов ва роҳбари мусиқӣ Зафар Абдуллоев барномаи консертиро дар сатҳи баланд омода кардаанд. Натиҷаи онҳо ва дигар омўзгорони таълимгоҳ аст, ки консерти ҳисоботии имсола нисбати солҳои гузашта боз ҳам хубтару хотирмон доир гардид.

Дар охири чорабинӣ аз ҷониби директори муассисаи таълимӣ Оқилов Идрис ва меҳмонон ба донишҷӯёни фаъолу соҳибҳунар ифтихорномаҳо ва тӯҳфаҳо супорида шуданд.      

                                                                                                                    Миралӣ Воҳидов омўзгори Коллеҷи фарҳанг

ГИРДУ АТРОФИ КОЛЛЕҶИ ФАРҲАНГ ГУЛЗОР ГАРДИД.

        Бо мақсади саҳм гузоштан дар корҳои ободонию зебогардонӣ ва гулу гузорзор гардонидани гирду атрофи Коллеҷи Фарҳанги ҷумҳуриявии баноми П.Буйдоқов бо супориши директори таълимгоҳ Оқилов Идрис санаи 11-уми майи соли 2019 донишҷуёну омўзгорон ба ҳашар баромада, гирду атрофи муассисаи таълимиро тозаю озода намуда, зиёда аз чорсад дона гулњои рангоранги ороишї шинониданд.

           Дар ин кор донишҷӯёну устодони таълимгоҳро ҷонишинони директор оид корҳои таълим ва тарбия Абдураҳмон Аттоев ва Шарипова Шаҳло  ҳидоят ва роҳнамоӣ карданд.

Тавре, директори Коллеҷи фарҳанг зимни суҳбат бо мо иброз намуданд, дар Коллеҷи фарҳанг ҳар ҳафта рӯзҳои шанбе гурўҳе аз донишҷӯён ба корҳои ободонию гулзор намудани  саҳни даргоҳи илму ҳунар ҷалб карда мешавад. Мақсади амалӣ гардонидани ин  тадбирҳо он аст, ки Коллеҷи фарҳанг бо зебогию сарсабзияш ҳамҷун як муассисаи соҳаи фарҳанг аз якдигар ташкилоту идораҳои њудуди ноҳияи Рӯдакӣ бо зебогияш фарқ дошта бошад.                                

М.Воҳидов

ЧОРАБИНӢ БАХШИДА БА РӮЗИ ҒАЛАБА

         9-уми майи соли 2019 аз Ғалабаи Иттиҳоди Шӯравӣ бар зидди Германияи фашистӣ дар Ҷанги Бузурги Ватании солҳои 1941-1945, 74 – сол сипарӣ мегардад. Ба муносибати ин Иди Зафар дар Тоҷикистони азиз чорабиниҳои зиёде доир мегарданд.

         Аз ҷумла, санаи 8-уми майи соли 2019 дар Коллеҷи фаҳанги ҷумҳуриявии ба номи П.Бӯйдоқов чорабинии хотирмони бошукуҳ доир гардид.

 Нахуст, дар назди ҳозирин директори мумассисаи таълимӣ Оқилов Идрис суханронӣ карда, аз корнамоиҳои иштирокчиёни Ҷанги Бузурги Ватанӣ ҳамчун оини ҷавонмардӣ, ватандӯстӣ ва намунаи ибрат барои наслҳои ҷавон ёдовар гардид.

Барномаи театрикунонидашудаи хотирмон, ки аз тарафи омӯзгорон, донишҷӯён ва хонандагони литсеи назди Коллеҷи фарҳанг омода шуда, пешкаши тамошобинон гашт, барои аҳли нишаст писанд омад.

РӮЗИ ЭҶОДИИ ОҲАНГСОЗ

         Рушди соҳаи фарҳанги миллӣ аз фаъолияти пурсамар ва садоқатмандонаи аҳли ҳунару санъат вобастагӣ дорад. Имрӯзҳо, ки ҷомеаи ҷаҳонӣ аз фарҳангу тамаддуни пурғановати мо – тоҷикон баҳра бурда, ба санъати нотакрорамон эҳтироми хоса доранд, нишонаи он аст, ки феълан аҳли фарҳанги кишвар, баҳри рушди соҳа заҳматҳои зиёде мекашанд. Яке аз санъаткорони шинохта, устоди Коллеҷи фарҳанги ҷумҳуриявии ба номи П.Бӯйдоқов Зафар Абдуллоев мебошанд. Номбурда дар навозиши асбоби миллӣ – Най яке аз беҳтаринҳо дар сатҳи ҷумҳурӣ ба ҳисоб меравад. Ин ҳунарманд дар баргузории чорабиниҳои фарҳангии ноҳияи Рӯдакӣ, инчунин таълиму тарбияи шогирдони зиёде ҷодаи мусиқишиносию ташаккули истеъдоди навозандагии он саҳми намоён мегузоранд.

         Аз ин ру бо мақсади қадрдонӣ намудан аз фаъолияти пурсамари омӯзгори пешқадам Зафар Абдуллоев санаи 2-юми майи соли ҷорӣ бо ташаббус ва дастгирии директори Коллеҷи фарҳанги ҷумҳуриявии ба номи П.Бӯйдоқов Оқилов Идрис Рӯзи Эҷодии Зафар Абдуллоев дар қасри фарҳанги ноҳия доир гардид. Дар рӯзи эҷодӣ ҳаводорони оҳангҳои офаридаи Зафар Абдуллоев дар толор ҷамъ омаданд

Нахуст дар назди ҳозирин, директори коллеҷи фарҳангии ҷумҳуриявии ба номи П.Бӯйдоқов Оқилов Идрис оид ба кору фаъолияти эҷодии Зафар Абдуллоев ба ҳозирин маълумот дода, ба ӯ дар фаъолияти минбаъдааш комёбиҳо таманно намуданд.

Сипас, донишҷӯёни муассисаи таълимӣ оҳангҳои эҷодкардаи Зафар Абдуллоевро бо истеъдоди баланд иҷро карданд.

Худи ҳунарманд, оҳангсоз Зафар Абдуллоев барои фароғату истироҳати аҳли толор чанде аз оҳангҳои дилнишин ва мусиқиҳои форами худро иҷро намуда, аз ҷониби аҳли нишаст бо кафкӯбиҳои бардавомпазирои шуд.